【親子一天遊】元朗環保農莊 :燒烤 小動物 Wargame

週末放假當然要聚天輪,位於元朗錦上路嘅環保農莊就最啱一家大小!有燒烤場、有機耕種教學、餵小動物、重有多款適合小朋友嘅收費遊戲,包括釣魚仔、沙池、淘金樂、DIY工作坊、電動車、war game場等,收費由$15至$40不等。同小朋友親親大自然之餘又具教育意義!

錦上路A出口一直步行冇幾耐就會見到環保農莊嘅標誌,跟指示再行兩分鐘左右就到入口!

農莊裏面環境優美,小徑有一排用廢棄玩具車裝飾嘅盆栽,認真環保又美觀!

一入農莊就有一個燒烤場,地方闊落,食物種類多,收費成人$130,小童$80,每位價錢包括一罐汽水及一枝清水,就可任燒任食四小時。

燒烤場肉類選擇多,啱哂一班食肉獸!

農場內重有幾款攤位遊戲,收費由$15至$40不等,小朋友玩到唔願走!

收費攤位遊戲隔離就有小小動物園,有兔仔、羊同豬,重可以買飼料親手餵佢地,$5一份。

War game場可選用水槍或海綿子彈,家長同小朋友都啱玩!

如果有時間,重可以去埋離環保農莊僅數分鐘路程嘅綠豆豆農莊同有機薈低碳農莊,前者免費入場,後者每位$60入場費。同樣環境優美、清淨。

綠豆豆農莊佔地廣闊,種植多種有機蔬菜。

有機薈低碳農莊同樣可以餵飼小動物,重有好多同菠蘿相關嘅親子活動,例如DIY菠蘿果醬、鳳梨酥製作、菠蘿瓶景、種植菠蘿、菠蘿紙手工、菠蘿輕黏土、砵仔糕、供小朋友搞生日會的場地同BBQ場等。

 

菠蘿園內種有大量皇后菠蘿,重可以親手摘,味道香甜,連條心都食得!

玩完一日,臨走前順路去埋錦上路站隔離嘅錦上路跳蚤市場,過百攤位貨品多到眼花,你都去吓尋寶啦!

 

環保農莊

地址:元朗錦上路四排石村60號 (錦上路站A出口直穿過露天停車場,步行約3分鐘)

電話:53398333

營業時間 :逢星期六、日及公眾假期,1pm - 11pm

網址:http://www.yl.hk/gf

 

有機薈低碳農莊

地址:元朗錦上路四排石村

電話:5579 2178

營業時間 :星期一至星期日,10am - 6pm (平日4人成團)。

網址:http://www.gogreenlife.com.hk/

 

錦上路跳蚤市場

營業時間 :逢星期六、日、公眾假期,10am - 8pm

網址:http://www.yl.hk/ksrsm/