文:Stacy
  
所謂「HR」,就是公司裡你最怕得罪又最想掐死的人。好多人都認為,這班人平時沒事做,利用老闆在同事面前狐假虎威,關鍵時刻還處處刁難你。「廢嘅」、「冇料扮四條」、「寸嘴」……大家對HR的評價來來去去不外如此。(小編利申:我們公司的HR姐姐們絕對例外,善良又美麗的她們是天使般的存在…)
  
一位號稱做了10年的資深HR,對於職場關於HR的如潮負評「睇唔過眼」,決心要為同行平反——HR界的KOL「小薯蓉」,現在一間本地出名的大型連鎖公司任職,10年間也兜兜轉轉換過幾間不同公司,但一直視HR為事業發展方向。
 
既寫書、又開Facebook Page的小薯蓉,如此解釋自己的名字,「喺HR呢行都有十幾年,被人磨,愈磨愈多,由薯仔變咗薯蓉」。呵呵,被磨成薯蓉的HR,一副斯文書生look,說是90後都不會有人質疑(可惜不願上鏡)。
 
見工:奇人怪狀大檢閱
  
小薯蓉說,做HR的好處是見多識廣,因為負責招聘,各種奇人怪狀都見過。「太多奇葩,網上攞出嚟俾人笑嘅case其實唔算誇張。」他見過有CV裡夾藝術照的阿叔,尖沙咀海旁擺pose,似足90年代失戀情歌中的MV男主角;也有來見工做test卻做到睡著的糊塗蛋;屎尿屁小問題多過HR的麻煩鬼;媽媽全程陪著見工的裙腳仔……「我本書入面有寫,做呢一行真會見到太多令人哭笑不得嘅人!」
  
請人不易,請到一個合適的人,也是HR的成就感來源,「如果你請到一個人,佢自己又好鍾意呢份工,好有投入感、熱情去做,我會覺得自己幫到人達成自己嘅事業理想,好滿足。」
 
溝通:老細與員工間的橋樑
  
因為坊間對HR印象不佳,小薯蓉索性將自己的新書書名改作「我係邪惡HR」。但實際上真如傳說中這麼邪惡?「今時今日人才競爭激烈,HR形象唔好,直接影響緊公司形象。我身邊好多好專業、態度亦都好好嘅HR朋友」。那邪惡形象如何來?「我哋係夾心餅,夾住喺老細同員工之間,有啲情況我哋唔想做,但逼於無奈都要做。」
  
小薯蓉認為,好的HR應該是「溝通嘅橋樑,而唔係打手」。做得理想當然是推廣公司policy的同時,也能贏得員工的理解。「一個當員工係重要財產嘅老細,同一個一心凈係想賺錢嘅老細,你喺你兩間公司做HR嘅感受係截然不同!想做好HR 嘅一定係想去對員工好嘅公司去做」。他笑說,苛刻政策當然是由管理層決定,HR有時真的是躺著也中槍。「HR好多時都係一個執行者嘅角色,始終都要成個管理層去決定。所以其實HR唔係真邪惡呀!」
 
裁人:最最心酸與難忘
  
HR亦並非永遠高高在上,冷若冰霜。「如果你問我做咗咁多年,最唔開心嘅經歷,我可以肯肯定話你知係裁員」。2008年金融海嘯,小薯蓉所在的公司經營狀況轉差。炒人的風聲不斷,那一天終於來到。收到老闆通知後開始準備裁員工作,逐個同員工派解僱信。
  
殘酷的面談已令他身心俱疲,「當我派完信行出會議室,見到嘅畫面令我畢生難忘。有年紀唔輕嘅叔叔拎住紙巾抹眼淚,有位被裁嘅同事同其他同事擁抱道別,其中一位冇被裁嘅女同事情緒激動,反過來需要其他同事安慰……」整個office愁雲密佈,如何穩定軍心也考驗著主管的功力。「裁員呢家嘢真係可免則免,求神拜佛都唔好要我再經歷一次!」
 
小薯蓉神總結:10大HR最怕見到的求職者
 

(圖片:劇照)
 
1.吹水怪
「面試時 不停吹噓自己嘅經驗,有幾叻幾叻,公司冇咗佢就會執笠!」講威水史要點到為止,保持謙遜心態才不會惹人反感。
   
2.試下仙
「我想試下呢份工啱唔啱我。」如果HR面試聽到「試下」呢兩個字,絕對會打冷震,「試下唔啱又走,咁即係搵我哋嚟搞喇。」
  
3. 烚熟臉
「讚我靚仔話我人nice,笑騎騎放毒蛇,呢個人相當有嫌疑。」甜言蜜語未必幫你爭取到份工,反而仲會令印象分大減。
  
 4.大話精
「有啲candidate好唔老實,會專登將底薪填高啲,或者將花紅、車錢、飯錢都計埋曬喺所謂嘅『底薪』入面。」其實很多公司都會做reference check,一查就睇穿你人格!
  
5.靜過鬼
「有啲人比較文靜,問佢一句,佢真係答你一句,你估你係Siri咩?Siri都識同我搞下懶gag啦!」面試是表現自己好機會,問你之前做過什麼,不是單單回答職位這麼簡單,有什麼職責、負責過什麼project,有什麼經驗……很多事可以講!
  
6.勁懶蟲 
「試過問candidate知唔知你見緊呢份工係做咩?佢諗咗一陣就話:『照字面睇呢!依份應該係文職工作。』我真係唔該嗮你。」見工前上網搵下公司資料,同埋睇返個招聘廣告,記住份工作什麼是常識吧!
  
7.黑臉神
「有啲candidate唔知係咪好唔想同你HR傾,或者覺得我哋問咗一哋好無聊嘅嘢,問幾句就黑嗮面唔想答。」見工做好表情管理都是必須,有的人覺得HR不懂他們專業領域的人,但HR有他們要考慮的因素,亦是公司面見程序的一部分。
  
8.奴隸獸
「最驚有candidate表白,『我真係好鍾意你哋間公司!任何一個職位我都肯做㗎』」公司想請一個適合的人做適合的職位,見工這樣的熱情「告白」,只會讓人覺得你並非真心想做這份工。
  
9.篇幅俠
「自我介紹成2000字,由小學興趣班到大學社團都一一背出嚟聽到人恰眼瞓」做足準備絕對精神可嘉,但成篇文背出來就會好死板,太長氣,只會想叫停。
  
10.計較王
「問車費點claim,最多claim到幾多,有冇飯錢、車錢津貼?」樣樣算到盡,緣分誓必早盡。員工福利好中意,但什麼問題不問而只關心員工福利,會令人覺得你好計較,何況「公司都未確實會請你」。
  
更多精彩內容,可關注小薯蓉新書《我係邪惡HR》:

 

出版社:非凡出版
出版日期:2017-05-15
ISBN:9789888463770
定價:HK$78.00
  
 
編輯:Stacy